龍蝦好“煮”意

(澳門日報) 2017年07月16日 04:11

    龍蝦好“煮”意

    好多人都鍾意食海鮮,經常會去酒樓點鮑魚、蝦、蟹等,龍蝦更係熱門之選。喺港澳地區,我哋最常買到嘅除咗本地龍蝦之外,仲有澳洲龍蝦同波士頓龍蝦。

    一般嚟講,波士頓龍蝦體內水份多,相對比較重秤,所以大家買嘅時候記得要慢慢揀,揀隻肉多啲嘅。買返屋企之後,最緊要即刻用清水洗乾淨,抹乾龍蝦身上嘅水份,因為龍蝦肉一浸過水就會變黑!

    好多朋友都會問我龍蝦除咗烚之外仲可以點煮,所以今期老周就教大家整“牛油芝士焗龍蝦”。所需材料有:約重一斤半嘅龍蝦兩隻、牛油三分之一磚、芝士兩片、白酒少許、上湯一碗、生粉一湯匙、薑同蒜一茶匙、葱花少許。首先將龍蝦用生粉拋一拋,令到生粉均勻包住龍蝦,落少少油、薑、蒜起鑊,龍蝦回鑊炒後加入所有調味料,以中火炒分幾鐘,再加入上湯同酒,蓋上鍋蓋焗約三分鐘,最後用生粉打芡同加入葱花就得喇!

    周  中(澳門美高梅金殿堂烹飪顧問)

馬上成為Qoos的Fans

【去論壇發表評論】