鳳尾筍炆腩肉

(澳門日報) 2018年12月02日 04:00

    鳳尾筍炆腩肉

    而家啲天氣話凍就凍,前幾日氣溫急降,相信大家都開始換上秋冬裝,口味亦都默默轉成熱辣辣肉食了吧?醒起屋企仲有幾包鳳尾筍,就想用嚟炆腩肉,真係好味到可以添多碗飯!

    今期就想教各位街坊以爽脆可口嘅鳳尾筍入饌,煮“鳳尾筍炆腩肉”呢味家庭菜。首先要準備好:腩仔肉一斤,最好肥瘦各一層,一層肉夾一層脂肪;鳳尾筍乾半斤;蒜頭五錢;生抽一又二分之一湯匙;蠔油一湯匙;糖兩茶匙;花雕酒一湯匙;磨豉醬二分之一湯匙。

    煮之前,先將買返嚟嘅腩仔肉用火燒一燒,去咗毛頭,並切成手指丁;筍乾則提前用水泡發好,洗淨後切成一寸長。做法很簡單:腩仔肉用滾水汆水後,用油爆一爆,加入各種調味料,再加清水過面,冚好蓋並以慢火煲約兩小時,炆至筍乾入味、腩仔肉腍時,就可以大火收汁。

    煮好後嘅腩肉新鮮食又得,食唔晒隔日食,不但不失原味,反而仲會更加入味,用來送飯真係一流。

    周  中 (澳門美高梅金殿堂烹飪顧問)

馬上成為Qoos的Fans

【去論壇發表評論】