鮑參翅“肚”

(澳門日報) 2018年11月04日 03:50

    鮑參翅“肚”

    大家一講開山珍海味,鮑參翅肚一定實走唔甩,佢哋均屬於“海八珍”,即係八種稀有珍貴嘅海產類食材。除咗“四大海味”(鮑魚、海參、魚翅同魚肚)外,仲包括燕窩、紫海膽、魚子同乾貝。

    大家可能對於魚肚呢個名比較唔熟悉,其實就係耳熟能詳嘅花膠,用魚嘅鰾加工而成。魚肚唔只係名貴海味,更加有好高嘅藥用價值,可以補氣血同潤肺健脾。滋陰養顏嘅魚肚仲係女士們嘅珍品,蘊含豐富嘅膠原蛋白,女士們食得多皮膚自然會變得光滑飽滿有彈性。

    市場上常見嘅魚肚都係乾製品,食之前需要用水或油泡發。中國人就特別鍾意用嚟燉、燜,或者整甜品。有人話對於魚肚嘅叫法反映唔同嘅身價,叫“魚鰾”通常係最平,叫“花膠”或者“魚肚”先至係中國人視為鮑參翅肚中嘅“肚”。魚肚中最矜貴、最頂級,莫過於係以黃唇魚嘅魚鰾製成嘅皇魚肚,更加有“海中黃金”、“魚膠之王”嘅說法。魚肚亦有公、乸之分,肚公形似馬鞍、質厚;肚母體形比較平展、質薄,價錢就會比肚公平得多,所以大家買魚肚嘅時候要小心,要分清魚肚嘅類別,因為價錢真係可以相差好遠!

    周  中 (澳門美高梅金殿堂烹飪顧問)

馬上成為Qoos的Fans

【去論壇發表評論】