魚唇替花膠 價廉又滋補

(澳門日報) 2018年10月07日 03:52

    魚唇替花膠  價廉又滋補

    正所謂“秋冬進補,來年打虎”,秋冬正係補身嘅最佳時節。養顏聖品花膠係唔少人嘅選擇,尤其係一眾貪靚嘅女士。花膠含有豐富蛋白質、膠質同鈣質,滋陰補腎又養顏,補健功效真係十隻手指都數唔晒,不過數到缺點,就一字記之曰——貴!

    要滋補養顏,唔使一定要食花膠嘅,食魚唇一樣得!魚唇媲美花膠,營養成分主要都係膠質,口感同樣厚滑,但係兩者嘅價錢就差天共地喇!大家可能會以為,價錢親民嘅魚唇係魚嘅口唇,但老周我介紹得又點會咁簡單呢?魚唇,其實係魚翅下面嘅肉,係鯊魚尾部無翅針嘅鰭。長形發咗嘅魚唇睇落同發咗嘅花膠有幾分相似,做法亦係大同小異,同樣先用熱水浸發至焾身,發好再用薑葱汆水,攤凍後可以用保鮮袋分裝成幾袋,放喺冰格,食之前再啤啤水,用嚟燉“螺頭魚唇雞腳湯”又或者“紅燒冬菇魚唇”呢類菜式一流。

    大家不妨趁依家呢種天氣,買啲魚唇返屋企補一補啦!

    周  中(澳門美高梅金殿堂烹飪顧問)

馬上成為Qoos的Fans

【去論壇發表評論】