餐前涼拌小菜夠開胃

(澳門日報) 2019年04月14日 03:55

    餐前涼拌小菜夠開胃

    前幾排同老友聚舊,廚師相聚,梗係講飲講食啦!粵菜真係一個講唔完嘅話題,講究食物本身嘅“味”力,重視原汁原味,當中,我認為最唔應該錯過就係餐前小菜。舊陣時,即係老周我仲係細路仔嘅時候,餐前小菜通常只會喺飲宴度出現,熱菜未上席前,為咗唔好餓親客人,廚師們會準備一啲小食,客人可以邊食邊傾,等嘅時候就唔會覺得無聊。

    為咗滿足廣東人嘴刁、食得新鮮嘅要求,前菜習慣選用易熟同易處理嘅食材,即點即做,上菜速度又快。一啲高級餐廳嘅餐前小菜會有花雕鴨舌、蒜片牛柳粒;中檔嘅則有涼拌萵苣筍、拍黃瓜、酸辣木耳等等;有啲餐廳仲簡單,一碟花生搞掂!

    老周依家去酒樓食飯都會叫一碟前菜嚟過口癮,我諗唔只我一個,好多人都會。呢幾排天口開始熱,特別想食啲涼拌菜開一開胃,最簡單莫過於涼拌拍黃瓜或涼拌萵苣筍。將洗淨嘅黃瓜或萵苣筍加鹽醃軟後,按個人口味加入魚露、白糖同麻油撈勻就食得。又或者轉成有去瘀同降血壓功效嘅雲耳,只需要將浸泡好嘅黑雲耳同白雲耳拖一拖滾水,變涼後加入蒜茸、鹽、麻油同鎮江醋,撈勻後就食得,夠晒簡單!

    周  中    (澳門美高梅金殿堂烹飪顧問)

馬上成為Qoos的Fans

【去論壇發表評論】