食水魚 補一補

(澳門日報) 2017年12月03日 04:12

    食水魚  補一補

    我哋廣東人成日講嘅水魚(唔係指被人搵笨嘅嗰種水魚),肉質鮮美,營養豐富,最適合宜家凍凍地嘅季節食。喺廣東地區,我哋習慣燉水魚湯或原隻蒸水魚;想食得矜貴啲就會整“綠柳垂絲”,即係炒水魚裙邊。

    老周就唔教大家整啲複雜嘢,今期簡簡單單教各位整一味雙冬燉水魚。材料包括:一隻斤半重嘅水魚,雙冬指冬菇同冬筍,六隻冬菇、四両冬筍、一嚿薑、十粒蒜頭、兩棵葱同少少芫荽。調味料方面,需要兩湯匙磨豉醬、一湯匙蠔油、一湯匙酒同兩茶匙糖。大家先用油爆熟蒜頭同薑,再加水魚一齊爆炒,之後將剩返嘅材料同調味料入鑊,加水浸過面,冚好蓋慢火燉大約一粒鐘,上菜嘅時候再加葱花同芫荽,咁就夠晒色香味啦!

    周  中(澳門美高梅金殿堂烹飪顧問)

馬上成為Qoos的Fans

【去論壇發表評論】