開口笑

(澳門日報) 2018年02月11日 04:00

    開口笑

    年近歲晚,中國人傳統都會炸油器過年,代表家肥屋潤。傳統油器有煎堆、油角同糖環等。煎堆都有分傳統實心、爆谷煎堆同埋餅狀嘅九江煎堆。煎堆做法相對比較麻煩,呢一期就等老周我教大家方便易整嘅笑口棗嚟應節啦。

    材料包括:麵粉一千克、雞蛋兩隻、白糖一百克、糖膠三百克、小蘇打粉十克、白芝麻一百克,油五十克。做法好簡單,首先喺盆入面放入雞蛋、糖同埋其他材料,用適量嘅水發勻,然後倒入麵粉搓成麵糰,摘成每粒約五十克嘅圓球,再碌啲芝麻。然後喺鑊內加入適量嘅油,燒至四成熱,再放入麵糰炸至金黃色,當你哋見到麵糰裂開口嘅時候就可以撈出嚟隔油,咁就大功告成啦!

    係呢度要提提大家,炸笑口棗嘅時候一定要注意油溫,油溫太高就好容易炸燶啊!

    周  中(澳門美高梅金殿堂烹飪顧問)

馬上成為Qoos的Fans

【去論壇發表評論】