鄰埠車展擺商場

(澳門日報) 2017年12月04日 03:21

    鄰埠車展擺商場

    假日閒逛可欣賞

    澳門車展規模大

    高檔豪車顯氣派

    有汽車發燒友常來往港澳,打理兩地業務,佢話假日逛香港大型商場,時見有車展,總會瀏覽一番,唔買都睇吓。

    澳門車行搞車展,昔日多在舖內,主要係新車發佈,邀請嘉賓舊客戶出席,藉此宣傳促銷。至於其他地方搞車展,亦有若干選擇。現今新口岸皇朝地段,前身商貿城,場地大,擺過大型車展,搞過熊貓展,城內飲飲食食,亦有購物,間有活動,成為市民假日去處。

    在酒店搞車展,有車行試過。當年氹仔新世紀,係小城最豪酒店,大堂富麗堂皇,十分夠照。代理平治的仁孚行,就趁開篷小跑SLK面世時在此展銷。酒店後來改名北京王府,年前摺埋。舊文華東方,即現金麗華,法拉利曾在此展出戰車,當年係香港和記電業代理。

    亦有車行在葡京新翼搞過車展,自旅遊塔建成後,有車行移師該處擺車展,室外場地適中,風涼水冷,不失為假日好節目。室內地下層擺過車展,車迷更集中。

    戶外搞車展,似乎未有好地方,有個時期擺過氹仔海洋。現時又點?有車行鍾情於氹仔花城,益街坊,大眾化。

    自新派大型娛樂場開設後,經營高檔轎車之車行,轉戰娛樂場內豪華酒店,豪車勁跑面世,都會搞個小型騷酒會,營造新車亮相氣氛。廠方會派高層或原車設計師來澳介紹新車,搵埋明星、車模助陣,壯大聲勢。每年一度的國際車展,規模更大過香港。

    澳門近年車市低迷,除受大環境影響,亦與車稅提升、養車成本增有關。風災浸壞車,災後車行略增生意,但比起最風光年頭,生意唔見大截,仍需開源節流,共度時艱!

    羅倫斯

馬上成為Qoos的Fans

【去論壇發表評論】