跑獵生涯難服侍

(澳門日報) 2018年07月13日 03:22

    跑獵生涯難服侍

    狗場執笠,跑狗頓成絕響。人固失業,狗亦無依。人尚可再搵工,狗則要轉行,唔跑,做寵物囉!事頭婆善心大發:要就來攞!愛狗之人聞之心喜,嘩!大隻蛤乸隨街跳,早早排隊去領狗。

    此狗實非一般寵物,終生跑獵,力氣無窮。拖佢行街,慘過扯大纜;且食得矜貴,餐餐牛扒雞肉,養人冇咁重皮。話雖如此,仍有人肯落沓,領返屋企。翌日打鑼冇咁早,速速把狗送回:“唔乜要喇!”“點解?”“屋企畀佢咬爛晒!”

    如此狗兒命苦也!幾百條命,前途未卜,倘無從安置,命堪危矣。

    賽狗上世紀三十年代源於上海,未幾由盧九家族及范潔朋等引進來澳。一年後卻因經營困難關閉。一九六三年重開至今。

    叔父憶述,當年澳門跑狗,哄動一時。開業之前,先有試跑,免費益街坊,不限年齡,佢亦跟隨大人進場,得睹新奇。

    西門公子

馬上成為Qoos的Fans

【去論壇發表評論】