越“潮”越食

(澳門日報) 2017年04月15日 21:10

    越“潮”越食

    老周我又做“潮”人喇,前兩期向大家介紹咗潮州菜嘅歷史,今期就教大家整潮州菜。

    潮州菜一向用料豐富,重於保留材料特有嘅風味同營養價值,多樣化嘅製作方式,造就出一道道獨特嘅潮州菜,例如:滷水獅頭鵝、鹹菜燉白鱔、煎蠔烙,又或係街頭小食牛丸米或牛雜粉。潮州菜甚至乎連甜品都非常出名,有白果芋泥、反沙芋、薑薯五果,真係無法抵抗潮州菜多樣嘅魅力!

    老周我向來關心大家嘅健康,今期想教大家整一道潮式開胃湯水——鹹檸檬鴨湯,以潮式美食應對而家天氣多變、胃口不佳嘅日子。所需材料有:老鴨一隻、鹹檸檬一個、排骨半磅、薑兩片、葱兩條。首先將鴨處理乾淨,連同排骨一齊出水,鹹檸檬洗一洗並對半切開,喺煲內放入所有材料同半煲水,再煮大約一個半鐘頭即可。大家不妨試吓啦!

    周  中(澳門美高梅金殿堂烹飪顧問)

馬上成為Qoos的Fans

【去論壇發表評論】