賽車期間冇得瞓

(澳門日報) 2017年11月13日 03:18

    賽車期間冇得瞓

    住戶仿似遭軟禁

    連日交通大擠塞

    安步當車無損失

    周四開始,一連四日大賽車揭戰幔,東望洋跑道由晨至暮再爆發強勁引擎聲。

    有住新口岸的朋友話,十多年來,已習慣大賽車封路及嘈聲,冇偈者,賽車辦咗六十幾屆,最初新填海荒蕪,只有十餘別墅,大片地方係菜地,只是近三四十年來才多高樓大廈。住戶明知賽車墟冚噪音多,但冇人監你買樓者,不存在有雞蛋先,抑或有雞先問題,冇得拗。有住戶鬼殺咁嘈,話應禁辦,實屬多餘。

    賽道封路,對緊貼跑道的大廈住戶確有影響,出入不便,出街時還較順利,但回家時,駐守警員會問住邊座大廈,住幾樓,生怕居民四圍走,有危險。

    不過,住松山跑道的住客,話知閣下住億元豪宅,賽車進行期間一律禁出入,遇頭暈身熱,行不得也哥哥。除非很危急,當局趁賽事休整期間,或會作出特殊決定,但機會較微。住海角遊雲的住戶,同樣變相“軟禁”。當然,住得這些地段,都知賽車前後要點做,毋須擔心,大把地方落腳。愛睇賽車之人更不愁被困,大可呼朋引類,來個近距離睇賽車,屋企就是看台,全無遮擋,別有風味。

    前幾年,另一住友誼大馬路附近的朋友,通常半夜踱橋,瞓到黃朝百晏,為免被賽車聲騷擾,索性趁賽車幾日外遊,好似春節避年一樣,後來索性搬竇。

    賽車勁嘈非問題,交通阻塞先係大問題。日來賽車跑道封了不少路口,友誼大馬路及附近一帶,包括南灣、新馬路、荷蘭園、高士德、美副將、雅廉訪及黑沙環、七粒明珠,繁忙時間大塞車。未賽先塞,真正賽時更塞,屆時行路快過坐車,如無必要,安步當車好過。

    羅倫斯

馬上成為Qoos的Fans

【去論壇發表評論】