補腦多食鵪鶉蛋

(澳門日報) 2017年10月08日 04:06

    補腦多食鵪鶉蛋

    上一期同大家講咗鵪鶉,今期梗係繼續講鵪鶉蛋啦!鵪鶉蛋係古代皇帝御用補品,有人叫鵪鶉蛋做“補腦丸”,因為佢有補腦嘅營養物質,比雞蛋仲要多三倍。現代人生活咁忙,特別係學生,成日都要用腦,食多啲鵪鶉蛋可以加強記憶力,學習都叻啲啦!

    查實鵪鶉蛋食法好多,呢期老周我一於教大家整鵪鶉蛋羅漢齋。材料包括鵪鶉蛋十隻、冬菇四隻、草菇四隻、水發竹笙四條、水發雲耳五錢、水發雪耳四錢、髮菜少許,鍾意嘅仲可以準備其他蔬菜。調味料需要鹽、糖各兩茶匙、蠔油三茶匙、生粉兩茶匙、麻油少許。首先將鵪鶉蛋烚熟、剝殼後上粉,用少少油爆至金黃色,同時將剩番嘅材料加鹽一齊烚熟備用。先用油起鑊,加入半碗水同調味料,水滾後落晒所有材料,煮約三分鐘,最後勾個芡就大功告成啦!

    周中提提你,雖然鵪鶉蛋可以補腦,但始終係高膽固醇食物,大家要適可而止啊!

    周  中(澳門美高梅金殿堂烹飪顧問)

馬上成為Qoos的Fans

【去論壇發表評論】