蛋包飯

(澳門日報) 2019年04月15日 03:14
蛋包飯
蛋包飯

    蛋包飯

    新年時逛超市,見到凍櫃有日本白飯魚,大喜!近年極少到街市買菜,似乎已多年冇食到白飯魚煎蛋了。

    都怪現在的凍肉超市越開越多、貨品越來越豐富,而且大多是歐洲貨,食落肚安心最重,價錢反而是其次(事實上亦不貴)。日本貨大多質優,但價錢並不便宜;例如一包五百克的白飯魚就要百五元,阿媽話齋:去街市買十斤八斤都得啦!

    問題是:現在街市都少見賣白飯魚呢!而且街市賣的是內地貨,分分鐘係流嘢!之前見過阿媽買回來的白飯魚有一隻手指咁長,食到嘴裡有硬骨就唔好啦!日本貨雖然貴,但一大包有排食,分攤到一個人一餐份量就唔覺得貴了。最重要係好食,我鍾意食嘛。

    白飯魚最家常做法係煎蛋,自細食到大。今次我就想做蛋包飯,白飯就是上一期做飯團的那種有些黏度的珍珠米溝泰國米煮的飯,這樣就不容易散出來了。外面淋上日式麻醬及麻油,與白飯魚最配!

    做法

    1.白飯魚放小篩中,沖水解凍、用廚紙吸乾水,用胡椒粉、岩鹽撈勻備用。

    2.雞蛋打散、芫茜葉切碎放蛋汁中,加入白飯魚成蛋漿。

    3.燒熱不黏鑊,放油、落一半蛋漿,盡量攤薄煎熟。

    4.當蛋漿面開始凝固,馬上放上一半白飯,把蛋皮兩面向中間覆蓋。

    5.提起不黏鑊,把蛋包飯順撥到碟上,輕手淋上麻醬及麻油即成。

    6.把另一半材料製作第二個蛋包飯。

    ※整個製作需時約十分鐘。

    材料:

    白飯魚50克、白飯1碗、蛋2隻、芫茜、胡椒粉、鹽、麻醬及麻油適量。

    穎  兒

馬上成為Qoos的Fans

【去論壇發表評論】