腸 粉

(澳門日報) 2017年09月10日 04:14

    腸    粉

    老周我飲親早茶,都一定會叫碟腸粉嚟嘆吓。腸粉源於廣州西關地區,自上世紀二十年代起流行。舊陣時,商販一般會喺朝早挑着擔上街叫賣。直到宜家,腸粉依然係非常受歡迎嘅小食,無論喺粥麵檔、酒家、茶樓,甚至連便利店都可以買到。儘管喺唔同地方腸粉嘅做法都唔一樣,不過大致可以分成三種,一種係乜嘢都唔加嘅齋腸粉,另一種係會加入牛肉、豬肉、蝦仁,或者雞蛋嘅鹹腸粉,最後一種就係會喺米漿內加入糖所整成嘅甜腸粉。

    其實整腸粉唔難,大家都可以喺屋企落手去做,只需要去街市或超市買包粘米粉,開水,加入少少生油整成米粉漿,之後喺大銻碟上鋪上濕棉布,並均勻倒入米粉漿,攤薄,鍾意嘅仲可以放入餡,蒸熟後用刀起出捲成長條形,再切段上碟,最後淋埋少少豉油同熟油,咁就大功告成啦!

    周  中(澳門美高梅金殿堂烹飪顧問)

馬上成為Qoos的Fans

【去論壇發表評論】