美食五味肉

(澳門日報) 2018年04月15日 03:52

    美食五味肉

    三月陽春,正係補身養陰嘅好時節。想要進補嘅話,首選梗係食水魚啦!水魚又叫甲魚,肉質有齊雞、鹿、牛、羊、豬五種肉嘅美味,所以又有“美食五味肉”呢個大名;營養豐富,食用後可以強身健體,亦有助促進血液循環。水魚殼仲係珍貴中藥材口添!

    水魚一般可以喺街市買到,現場叫老細幫手劏開、斬件,就可以直接拎返屋企煮嚟食,燉湯又得,燜同蒸都得!老周我覺得最方便就係整“北芪紅棗冬菇蒸水魚”,等我教你哋點整啦!

    材料:約一斤重水魚一隻;北芪四片;冬菇四隻,切絲;紅棗四粒,去核切絲;薑、葱、鹽、糖各一茶匙;蠔油兩茶匙;生粉三茶匙;酒少許。做法:將水魚洗乾淨,用毛巾索乾水後斬件,放上碟,將剩餘材料同調味料攪勻,均勻鋪滿水魚面,蒸大約二十分鐘,就大功告成啦!

    周  中(澳門美高梅金殿堂烹飪顧問)

馬上成為Qoos的Fans

【去論壇發表評論】