秋天食蟹正合時

(澳門日報) 2017年11月12日 03:57

    秋天食蟹正合時

    又到咗“持蟹賞菊”嘅秋天,正正係食蟹最佳季節。話就話我哋一年四季都可以食到蟹,但由於蟹習慣喺秋天養肥自己過冬,所以呢個時候嘅蟹係特別肥美,肉質細嫩又膏多油滿!

    秋天識食就梗係要食大閘蟹啦!雖然今年大閘蟹嘅供應比較緊張,不過要食正宗嘅大閘蟹亦都唔難,好似我哋酒店中餐廳就以洞庭湖大閘蟹打造特色蟹餚,有原汁原味嘅清蒸原隻大閘蟹、令人齒頰留香嘅蟹粉擔擔麵、燕液蟹粉籃等,為鍾意食蟹嘅朋友帶嚟一場秋蟹盛宴。

    其實澳門肉蟹都幾出名,大家可以喺街市買兩隻肉蟹,洗淨後切開八件,再準備兩湯匙梅醬、二分之一杯上湯、一湯匙生粉,小量嘅葱度、蒜茸、薑茸、辣椒粒同鹽。將蟹肉上少少生粉,用油爆香後,加入上湯同所有調味料,用蓋焗約三分鐘,最後再用生粉打個芡,就搞掂一味梅醬焗肉蟹。

    係咪睇見都流口水呢?趁住時令蟹季,大家快啲整嚟同屋企人一齊嘆吓啦!

    周  中

    (澳門美高梅金殿堂烹飪顧問)

馬上成為Qoos的Fans

【去論壇發表評論】