炎炎夏日蒸乳鴿

(澳門日報) 2019年07月07日 03:47

    炎炎夏日蒸乳鴿

    尋晚睇電視,見到劇入面主角買隻乳鴿返屋企做宵夜,老周我睇見就流口水,決定今日就去買嚟食,過吓口癮。

    所謂乳鴿,就係指出世無幾耐嘅鴿子,好食嘅乳鴿最好係出世大約四個禮拜,過咗呢個時間嘅乳鴿肉質太老,唔夠秤嘅肉少之餘,仲會帶有腥味,真係四個禮拜啱啱好!我哋廣東人真係好鍾意食乳鴿,石岐乳鴿可以話係當中之最,以脆、鮮、嫩出名。法國就更加將乳鴿演繹得爐火純青,“嫩煎乳鴿胸”、“油封乳鴿腿”喺全球各地都相當有名。

    你哋又有冇發現,通常整乳鴿都係紅燒、炸、沙薑、葱油、滷水,又或者豉油呢?蒸乳鴿反而聽得少,所以我就想教大家以當造嘅荷葉入饌,整味“清香荷葉蒸乳鴿”,趕走暑氣。材料:乳鴿兩隻、新鮮荷葉一塊、紅棗四粒、鮮蓮子二両、薑片數片、酒少許、生粉一又半茶匙、鹽一茶匙、蠔油一湯匙、糖一茶匙。煮法:將乳鴿切件後洗淨,用所有調味料醃約兩分鐘;荷葉用滾水拖一拖,等到鮮荷葉變軟,就可以將乳鴿放入內,好似包糯米雞咁,蒸大約二十分鐘就食得!

    周  中(澳門美高梅金殿堂烹飪顧問)

馬上成為Qoos的Fans

【去論壇發表評論】