火腩燜大鱔 冶味又香口

(澳門日報) 2018年07月08日 03:37

    火腩燜大鱔  冶味又香口

    夏至已過,我哋正式進入炎夏!近排天氣真係好熱,出街有種被曬到融嘅感覺,食嘢又無乜嘢胃口,口淡淡想食海鮮又撞正一年一度嘅南海休漁期。不過大家又唔使愁,唔食海魚我哋可以轉食淡水魚,例如白鱔。

    白鱔,即係我哋平時叫開嘅鰻魚,含有豐富嘅蛋白質,又容易消化。日本人認為喺夏天食白鱔能夠補充體力亦可以消消暑氣。今期老周就想教大家整“涼瓜火腩燜大鱔”呢味夏令菜。

    要準備嘅材料包括:白鱔半條;涼瓜兩個;火腩四両;蒜頭粒一個,去衣;辣椒粒同薑米少許;豆豉茸一湯匙;蠔油一湯匙;糖一又二分之一茶匙;鹽一茶匙;酒同麻油少許;生粉兩湯匙。

    做法:白鱔先用滾水一拖,洗淨切件,用生粉裹好。涼瓜切件後用鹽先醃再沖水。起鑊將鱔魚煎一煎、蒜頭粒炸一炸,將豆豉茸同涼瓜落鑊,再加埋其他材料同半碗水,冚蓋焗煮三分鐘,落生粉埋芡就大功告成!

    呢個禮拜大家不妨煮呢味香口菜嚟度過炎夏喇!

    周  中(澳門美高梅金殿堂烹飪顧問)

馬上成為Qoos的Fans

【去論壇發表評論】