極品鹹魚釣大賊

(澳門日報) 2018年08月10日 03:30

    極品鹹魚釣大賊

    酒神馬八碰上酒仙郁人,本應是酒壇大封相,足拼個天昏地暗。然呢輪似乎八字唔啱,兩人竟雙雙捨濁取清,清水來清水去,做其水客。一班酒徒頓然六神無主,飲定唔飲,舉杯不定,無得其樂。還是馬八善解人意:“我唔飲,你哋飲!”由是酒瓶一開,舉座食雞有雞味,食魚有魚味。

    忽見雙魚上枱,一鹹一鮮,黃公子驚呼:“嘩,生死戀!”此鹹魚配鮮魚,乃當年新配搭,久違也已,於今猶如故友重逢,難免驚呼。鹹魚滿油油喉:“生死戀唔老利,早稱天長地久矣。”鹹魚滿當年創此菜式,一時無倆,亦成一絕。鮮魚易搵,靚鹹魚難求。鹹魚滿所以牙擦,皆因鹹魚係佢私伙,有得送,冇得賣。

    黃公子忽提一趣事,鹹魚滿飯店牙祭,忽覺手袋翼飛,即糾馬追贓。未幾擒賊,贓卻枉然,只餘空袋,眾皆惜之。鹹魚滿卻笑騎騎:少少錢,冇傷肝,係唔見咗舊鹹魚!原來袋中藏私伙鹹魚,賊亦起痰,乃當年“鹹魚釣大賊”也。

    西門公子

馬上成為Qoos的Fans

【去論壇發表評論】