新一年芝麻開花節節高

(澳門日報) 2012年12月30日 03:56

    新一年芝麻開花節節高

    呢排天口凍冰冰,唔知係咪凍到連啲魚蝦蟹都齊齊冬眠,街市嘅靚海鮮買少見少,唯有忍吓口喇。不過聽聞酒店盛事餐廳嘅節日海鮮自助餐呢排人氣好猛,有唔少香港為食客專程過大海嘆海鮮大餐,聽落眞係有啲誇張喎。走去問廚師老友,佢話所有食材都係新鮮返貨,尤其魚蝦蟹幾乎都係海外同內地空運過來,加之今次自助大餐價錢實惠,旨在節日谷多啲人氣,唔怪之得次次行過都見爆滿。

    講開又講,年尾節日一個接一個,聖誕過完轉眼就到元旦,四圍啲酒店商舖都佈置得好有節日氣氛。酒店今年同樣會搞千人倒數派對,個個盛裝打扮一齊倒數迎新年。老周我幾十歲人,勁歌熱舞又熬夜就唔啱我喇,呢排反而係忙住朝朝同街市“有個約會”,揀返啲新鮮食材,夜晩就整幾味靚餸,喺屋企同班老友一齊打邊爐吹吓水,一樣咁熱鬧。有老友感慨話時間過得眞係快,諗起舊時經濟差,未必餐餐都可以食到飽,就算係過節又邊會有依家咁好餸呢。我就話有比較先至有進步,日子當然係要越過越好啦。轉眼又快到新一年,就借專欄寳地一用,預先祝各位新年進步,身體健康!

    (澳門美高梅金殿堂烹飪顧問)

    周  中

馬上成為Qoos的Fans

【去論壇發表評論】