拒載揀客十數載

(澳門日報) 2018年04月16日 03:29

    拒載揀客十數載

    昔日濫收起禍害

    的士違規難遏止

    新例須把亂象治

    的士規章草案出爐,條文針對拒載、揀客、議價、濫收車資,加重罰則。何時生效,還需立法會審議。

    澳門的士服務,歷來為市民所詬病。聽老街坊說,打從上世紀七、八十年代開始,司機較少拒載、揀客(皆因打的者不算多),但濫收車資似奉旨,乘客若要找贖,碎銀例必落格,多謝冇聲。

    亦有個時期,無良司機趁繁忙時間濫載,唔落旗在街上接客,當時老街坊第一個上車,最終變了三個唔同地點乘客,司機嘻皮笑臉話方便人,實質監粗來,深知冇證人,告唔入,但落車時唔會收平,吹佢唔脹。

    三十多年來,延續拒載、揀客、濫收車資,前朝只顧刮槓,少做工夫,形成此行業變本加厲。就算回歸後,積重難返,歪風一直存在。

    隨着自由行開放、賭場遍地開花,的士服務似變旅客為主,司機多湧到賭場候客,不法司機更多蠱惑招,“釣泥鯭”、宰客層出不窮。不少司機恐舊區塞車,多不願意前往,旅遊區如大三巴牌坊,司機不願去,蓋因石仔路不好走,又要兜大三巴街,出沙欄仔口至連勝街大塞車,見到怕怕。難為那些扶老攜幼的旅客卻在的士站呆等,費時失事。

    的士司機由害群之馬變害馬之群,越來越多唔守規矩,卻害了大批奉公守法好司機,故而忠直司機還嫌新例罰得太少,五年四犯才釘牌唔夠阻嚇力。認為只要不拒載坑客,唔犯規點會罰。不過希望當局勿濫用票控,須查明實據,勿濫殺無辜,事關有些乘客無理取鬧,惡過條蛇,法律應該講清講楚。

    市民均希望當局今番真能整治的士歪風,勿再拖拉!

    羅倫斯

馬上成為Qoos的Fans

【去論壇發表評論】