戰車首要講質素

(澳門日報) 2017年05月08日 11:10

    戰車首要講質素

    人車合一始做到

    一級平治勢仍勁

    拉利改良今屆醒

    今屆一級方程式有瞄頭,長霸頭位多年的平治,今番多了法拉利挑機,咸美頓、維迪爾惡鬥難免。

    過往幾屆,都係平治世界,咸爺猛攞分站冠軍,羅斯保第二,其他車隊無力威脅,間中攞個分站冠軍鬼咁歡喜。平治經常包Q,搞到其他車手冇晒癮。冇人同平治鬥,就搵自己友鬥,羅斯保不忿長屈第二,明明有時快過咸爺,車隊亦要佢讓車,條氣唔順,遂唔聽車隊指令,導致兩人各不相讓,幾乎互撞,激死車隊老闆。

    直至去年,羅斯保發威,與咸爺鬥到最尾,最後乘其甩漏,終奪總冠,揚眉吐氣,即刻唔撈,咸爺冇仇報。

    平治今屆撬走威廉士車手,即係新冰人保達斯。此子被咸爺威名壓過,不敢造次,任由車隊安排,做第二車手。平治高層對新人不敢寄予厚望,認為難填羅斯保位。經幾站比賽,保達斯顯露個人實力,俄站首度奪冠,嶄露頭角。

    實際上,F1戰車好壞比車手更重要,平治靠超卓引擎雄霸多年,其他車隊難以匹敵。直至今年,法拉利改良成功,直迫平治,維迪爾再度威脅咸爺,造就今年賽事有睇頭。

    維迪爾年前效力紅牛車隊,連奪四屆總冠,就係勝在車靚人更正。上兩屆法拉利不濟,維迪爾徒呼奈何,成了英雄無用武之地。

    阿朗素早年效力雷諾車隊奪得兩次總冠,近年加盟麥拿倫後,戰車唔爭氣,今屆比賽冇次完成,甚至不能出賽,唔通話阿朗素冇料?強如七屆總冠老舒麥加,復出時再加盟前身布朗車隊的梅賽德斯車隊,結果未贏過冠軍,證明戰車力有不逮,便難人車合一矣。

    羅倫斯

馬上成為Qoos的Fans

【去論壇發表評論】