復活節蛋黃哥

(澳門日報) 2017年04月17日 11:47
復活節蛋黃哥

    復活節蛋黃哥

    今次來到一家位於高士德的Cafe,就在培正中學斜對面,我被它的彩色招牌吸引,好似雪糕溶化咁,還有用一朵雲做標誌的壁燈。我想它一定只有甜品供應,但一看餐牌,原來還有中午特價套餐、有飯食、有意粉,仲有牛扒。但我已被它櫥窗的甜品深深吸引,急不及待推門進去,望見天花懸垂下來的彩色氣球,滿滿的,很有法國的Bonbon可愛品味,立刻有一種輕鬆感,店內還有鮮花裝飾,配上牆身的裝飾更有夢幻繽紛感覺。

    我迫不及待點了復活節蛋黃哥雞仔,旁邊仲有用朱古力做的雀巢,上面有隻金蛋,真係夠晒應節。蛋黃哥個樣懵懵哋,竟然係流心芒果肉做的夾心,加上香濃軟滑的茉莉慕絲。聽講係用英國出名的茉莉花茶浸在忌廉內數小時,才令蛋糕有陣陣茉莉花味,但又唔蓋過鮮芒果的清甜。雀巢係用牛奶朱古力做,金蛋用白朱古力做,薄薄的外層望落去就好似真的蛋殼咁透明,上面仲放了一片羽毛,輕飄飄的感覺和易碎的蛋殼,很美的設計理念,再加上個搞笑的蛋黃哥扮雞仔樣,嚴肅中帶點幽默。

    之後出場的是正方形西瓜蛋糕,外形特別,不像一般的圓形西瓜,味道清新。裡面真係有一層厚厚的西瓜肉,清甜之餘,外面包住兩層唔同的味道,一層係酸酸哋熱情果果凍,味道與西瓜的清甜正相反,更能顯出西瓜甜味;外面係雲呢拿味的西瓜皮,味道食起來很和諧,從未試過一個外形和味道同西瓜咁相似的蛋糕呢!

    店主說他們不用香精等人造味道,味道源於鮮果自身果味。店內仲有鮮果小泡芙系列,切開小泡芙,發現裡面有香草夾的吉士醬之外,仲有特製鮮果餡,不太甜,很配合香草夾的味道。

    蛋糕口味和設計都是店主創作,每天在店內新鮮焗製,真是佩服。我非常支持澳門本地的原創,這是一間很用心的店唷!我諗我下次仲會再來,希望食物和甜品一樣有水準。

    Eleanor

馬上成為Qoos的Fans

【去論壇發表評論】