幾十秒搞掂“車仔麵”

(澳門日報) 2018年03月11日 03:36

    幾十秒搞掂“車仔麵”

    近年飲食文化變得好似淥車仔麵一樣咁快!車仔麵,顧名思義就係流動小食。當時小販為咗方便販賣同“走鬼”,大多數會用手推車開檔,用架車仔裝住爐具同金屬“煮食格”,麵條、湯汁同配料就放落格仔入面,咁就可以去到邊、賣到邊。以前為咗搵食,真係乜嘢辦法都諗得出。

    車仔麵嘅做法真係好鬼簡單,預先喺屋企煮熟魚蛋、豬皮、蘿蔔、豬紅等材料,再準備好滾水同湯底,任客人點好配菜後將麵餅淥一淥,加啲湯、辣椒醬呢類調味料就搞掂啦!

    到咗今時今日,車仔麵已經唔止係平價、“醫肚”嘅食物咁簡單,整得好啲更可以搖身一變成為米芝蓮推介嘅街頭小食,所以話現代飲食文化係包容同多姿多彩啊!

    周  中(澳門美高梅金殿堂烹飪顧問)

馬上成為Qoos的Fans

【去論壇發表評論】