宮廷點心“驢打滾”

(澳門日報) 2017年08月13日 04:15

    宮廷點心“驢打滾”

    驢打滾,又叫豆麵糕、豆麵卷子,係北京傳統風味小食,喺清朝更被列入為宮廷食品。

    相傳清朝時,御膳房本來為皇上準備咗一道年糕,點知太監唔小心將年糕跌咗落一個裝滿黃豆粉嘅桶入面,年糕就黐滿晒粉。點整都整唔乾淨,但係重新整又趕唔切,所以太監就只好硬住頭皮將年糕呈上皇上,仲稱之為“驢打滾”。因為年糕表面有一層黃豆粉,睇落就好似驢仔喺地上打滾後,成身黐滿泥土咁嘅樣!點知皇上一食,十分喜愛,從此驢打滾成為清宮御膳必備點心。

    驢打滾以糯米粉為主要材料,中間就用紅豆做餡。做法係先將糯米粉加水揉成糰,上鍋蒸熟後,將一小塊麵糰壓成皮,包入紅豆餡,再搓成湯圓狀,最後撒上炒熟嘅黃豆粉就可以喇。覺得自己整太麻煩?其實要食到豆香餡甜嘅驢打滾好簡單,咪就係嚟我哋酒店食八方旗下嘅北廚食囉!

    周  中(澳門美高梅金殿堂烹飪顧問)

馬上成為Qoos的Fans

【去論壇發表評論】