夏日冬瓜湯

(澳門日報) 2018年06月10日 04:11

    夏日冬瓜湯

    炎熱嘅夏天,大家好容易會覺得口淡淡,無甚胃口。我國人有句說話叫做“不時不食”,指食嘢要講究季節同時令,夏天呢個最需要生津消暑嘅季節就最適合食瓜類,冬瓜更加係當中之最。冬瓜肉可以清熱解暑,冬瓜皮又利水消腫,幫我哋預防中暑,大家不妨多吃!

    今日就等老周教大家整返個夏日冬瓜湯嚟消消暑啦!冬瓜湯材料價廉物美,既可以用嚟當湯水飲,又可以攞嚟做泡飯,清淡易入口,真係一流!材料包括:一斤冬瓜去皮切粒、四両雞肉切粒、二両蝦粒、二両鮮香菇或冬菇、少許夜香花、二両鮮蓮子,同兩片大頭菜切粒。

    做法好簡單,將所有材料汆水備用。先將冬瓜粒同大頭菜粒放入煲內加清水煲到冬瓜腍身,之後加入所有材料煲三分鐘左右就試試味。一般放咗大頭菜已經有鹹味,如果唔夠味就可以加少少鹽,食嘅時候再加埋夜香花就搞掂啦!

    周  中 (澳門美高梅金殿堂烹飪顧問)

馬上成為Qoos的Fans

【去論壇發表評論】