什錦冰豆腐慶雙節

(澳門日報) 2019年05月12日 03:56

    什錦冰豆腐慶雙節

    今日係母親節,咁啱得咁蹻又係農曆四月初八佛誕節,俗稱浴佛節,應該唔少人聽日會補假。有三日連假放,真係開心!

    喺呢一個佛教創始人釋迦牟尼生日嘅日子,寺院以及社會信眾都會熱烈慶祝,應節食品更加係唔少得。後生一輩未必會知,其實我哋廣東地區嘅佛教徒傳統上會以“欒樨餅”(或叫“煙樨餅”)嚟供佛。原材料係農曆四月最當造嘅欒樨葉,整出嚟會係墨綠色,入口煙韌,味道清香,雖然有少少苦,但食完會回甘,寓意“苦盡甘來”,幾有意思啊!

    今日,大部分善信亦會食素以表尊敬,我都唔會例外,每年都會整什錦冰豆腐嚟應節。準備好材料:豆香濃郁又唔容易煎爛嘅板豆腐兩件,提早一日放入冰格凍;冬菇、荷豆、雲耳、甘筍共四両;素蠔油一湯匙;生抽一茶匙;糖一茶匙;麻油一茶匙;生粉一又二分之一湯匙。整法唔算複雜,冰豆腐解凍,用水浸軟後切骨排形,用紙巾索乾水分。大滾水落一茶匙鹽,將冬菇、荷豆等材料出水,待用。落油,待油滾後落豆腐煎至金黃色,撈起瀝油。倒去所有油,放半碗清水,再放入所有材料同調味料,煮約三分鐘,最後用生粉打芡。各位仔女,不妨今日就整呢味佛誕應節餸嚟孝順媽媽啦!

    周  中(澳門美高梅金殿堂烹飪顧問)

馬上成為Qoos的Fans

【去論壇發表評論】