一年到頭為食無休

(澳門日報) 2012年12月23日 04:15

    一年到頭為食無休

    早幾日喺香港搞咗個“周中飯局”,當同班為食老友齊齊食個“年尾飯”。其實近年我都算半退出“江湖”,所以今次呢個飯局原先只係預定搞個小團,一兩圍檯老友一齊食個熱鬧就算。點知飯局消息傳出去冇耐,就已經有八十幾人預約,實在令老周我受寵若驚。後來又再“安歌”一場,都有七十幾人參加,眞係夠晒皮喇。同班捧場飯友傾開偈先知,其中幾位竟然係我喺凱悅軒時嘅舊客仔,不經不覺老周我呢個嘜頭已經有成十幾二十年,你話唔感動至出奇。唔怕同你講,我大半世人喺廚房揸鑊鏟,次次年底或者開春搞“飯局”都有朋友專程捧場支持,嗰種滿足感簡直同歌手去紅館開個人演唱會差唔多,感動到不得了。

    話咁快一年就到頭,今年我都唔少得同幾位老友記一齊“做冬”。每年喺屋企“做冬”對我來講都係一件重要任務。冬至當日一大朝就去街市採購新鮮食材唔使講,成個晏晝就喺廚房忙個不停。除咗落足心機整返幾味拿手靚餸,當然冇走漏必不可少嘅湯圓喇。到咗晩飯時間,陪老婆同成檯耆英老友坐埋一齊,大家輕輕鬆鬆食吓飯吹吓水,此情此景眞係溫暖又幸福,忙開一日其實又算啲乜呢?

    (澳門美高梅金殿堂烹飪顧問)

    周中

馬上成為Qoos的Fans

【去論壇發表評論】