“麵”對新一年

(澳門日報) 2019年01月06日 03:40

    “麵”對新一年

    眨吓眼又到新一年,大家有乜新年願望?又去咗邊度倒數?提到新年嘅習俗,喺唔少澳門人都視之為“鄉下”嘅日本,元旦係大節日,日本人會以“跨年蕎麥麵”當作一年嘅最後一餐,象徵長壽同吉祥,就同我哋中國人喺長輩生日時準備麵食祝賀一樣!

    中國人嘅主食不外乎係米飯同麵條。成日都聽到人講“北方麵條,南方米飯”,古時候的確如此。以前麵條係北方地區嘅主食,嗰時大家會叫佢做“湯餅”,到咗後期,更出現“水引”同“湯麵”呢類表示麵條嘅用詞。南北兩地嘅麵條其實有好大嘅分別,北方麵條粗,但比較軟滑柔韌;南方麵條呢,多數會喺和麵嘅時候加入雞蛋或鴨蛋,製作成蛋麵,相對嚟講麵身幼,麵質亦較爽口彈牙。

    時至今日,麵條已經成為大家不可或缺嘅主食,經過唔同地方嘅演化,亦衍生出唔同嘅特色麵食。例如廣東雲吞麵、山西刀削麵、四川擔擔麵、蘭州拉麵等。要食勻咁多種麵其實唔一定要到當地嘅,嚟我哋酒店就可以食到正宗又齊全嘅中式麵食。一個地方,多種風味,真係幾正!大家有時間不妨嚟我哋度“麵”對新一年啦!

    周  中 (澳門美高梅金殿堂烹飪顧問)

馬上成為Qoos的Fans

【去論壇發表評論】