“活化石”鱟魚

(澳門日報) 2018年01月14日 04:14

    “活化石”鱟魚

    鱟魚,有人叫佢做“活化石”,佢喺遠古時代已經出現,由於直到依家佢嘅樣都無乜點變過,所以大家就叫佢做“活化石”。喺亞洲,鱟魚主要分佈中國長江以南沿海包括香港、日本、韓國、泰國、馬來西亞,喺潮州同沿海一帶地區仲係海鮮名菜口添!

    鱟魚外殼龐大,形狀好似將軍帽,殼下面有十二隻爪。由於鱟魚本身嘅肉唔多,所以廚師通常會將鱟魚子製成醬,呢個醬堪稱比魚子醬仲要矜貴。剩低嘅爪肉就會整成肉碎,再伴少少魚子一齊煮,變化出其他菜式,例如潮汕經典小食鱟粿。

    鱟魚除咗可以作為食材之外,佢嘅血仲有好高嘅醫學價值。鱟魚嘅血係藍色,非常獨特,可以提煉成試劑用嚟檢測病毒。不過依家鱟魚已經被視為瀕危受保護動物,極有可能會絕種,所以我哋應該要將佢好好保護,唔好再食啦!

    周  中

    (澳門美高梅金殿堂烹飪顧問)

馬上成為Qoos的Fans

【去論壇發表評論】